Ek het Early B vir die eerste keer gehoor, so paar weke terug, op die Francois Van Coke en Vriende EP en dadelik van die colab, Altyd Lief vir Jou, gehou. Toe ek ook, so week of twee terug, die song Ben Ten hoor het ek hom in die Cheesy Rap boksie geplaas, daar tussen die twee steunpilare van Zef hip-hop: Die Antwoord en Jack Parow. Ben Ten is ‘n clever, stoute maar catchy song en gaan seker ‘n moerse hit wees maar jy gaan vinnig gatvol raak daarvoor, hoor.  Ok rewind ‘n paar dekades, toe ek nog ‘n laaitie was, want memories van brasse soos DJ Jazzy Jeff and the Fresh Prince se early stuff en die meer berugte en jagse, Tone Loc en Two Live Crew, het oral op ge-pop. Fast forward weer tot nou en ek is nie meer ‘n moerse fan van die zef en cheesy kant van hip-hop nie maar Aangename Kennis het my nogal onkant gevang. Dit was glad nie wat ek verwag het nie. Early B is wragtag soos die Francois Van Coke van Suid-Afrikaanse hip-hop. Jirre, nou moet ek seker verduidelik hoekom?My kennis van die genre is nie so up to scratch soos my metal, rock en blues kennis nie, but here goes…

Early B se styles en beats is all over the place. Hy leen by ‘n klomp verskillende genres en hy is kakvinnig met tye en vlymskerp. Miskien nie so vinnig soos Busta Rhymes, Twista of Eminem nie maar dis pretty impressive. Gooi die song Cerebellum hard op ‘n system met behoorlike bass dan sal djy verstaan, my bru! Ek hoor verspreide brokkies old school vibes: tappit nineties techno beats (luister Potte feat. Jack Parow en Justin Vegas) en die West Coast influence met daai keyboard sound wat Snoop Dogg en Tupac altyd gebruik het (gooi Bid vir Pouse). Early B is ver van gangster rap af maar daar is songs wat op die sosio-ekonomiese en sosiale euwels in SA fokus en dis waar hy my aandag meer behou het – so saam met die ou East Coast influence ook – met meer komplekse lirieke en metafore. Dit werk fokken lekker in Afrikaans. Soos die song, Amen, waarin hy geloof, geweld en die skynheiligheid van die ouer geslag duidelik bespreek. Duidelik! Duk Vir Drugs is ‘n briljante song. Dis Kwaito-township-rap met ‘n positiewe anti-drugs boodskap wat die kollig op die verwoestende effek van dwelmmisbruik in armer gemeenskappe plaas. Ken jou Waarde feat. Adam is weer ‘n sad song oor vroue en kindermishandeling. Early B draai vir seker nie doekies om nie en is doodeerlik as dit by moeilike temas kom. Daar is ook lekker party vibes soos Wikkel Hulle en P.E. (‘n tribute vir die Baai waar Early B vandaan kom). Plat Badge, ‘n song oor high-maintenance vroue, het weer ‘n moerse eighties vibe wat ek baie gbeniet.

Ek dink daar het uiteindelik ‘n Afrikaanse rapper sy hand opgesteek wat deur middel van verskillende style sy kulturule omstandighede kan uitdruk in iets kommersieël suksesvol en wie voorts kan bou op die werk wat Kaapstad hip-hop legends soos Prophets of da City en Brasse van die Kaap begin het. Hierdie album het iets vir almal: van hip-hop fans tot mense wat nie die verskil tussen NWA en Guns and Roses ken nie. Hy het ‘n relatable manier hoe hy trends in ons moderne samelewing opsom: Blesser en Friendzone is my laaste voorbeelde. Hip-hop rolmodelle vir kinders in die gevaarlike buurte is mos baie welkom.

Aangename kennis, Early B!
Gee my ‘n Amen!