Ons (griffin & chopper) se boek, Is Dit Net Ek Of Is Als Tos? word hierdie jaar (2018) teen Augustus se kant 10 jaar oud. Om dit te celebrate het ons besluit om alfabeties met die lys af te gaan en ‘n paar topics uit die boek te kies om weekliks hier op Watkykjy te publish, seinde dat ons die regte besit. Dis lekker kort stukkies wat jy op die kakhuis kan lees. Dink daaraan as jou klein zef kakhuisbybeltjie met pitkos vir elke dag… Wel, elke dag tot ongeveer Augustus.

Corporate gholfhemde

Mens spandeer agt ure uit elke dag by die werk. Wel, meeste van ons gewone sotte wat nie kan bekostig om tienuur die oggend by Vida e Caffé in die son te sit en ballas bak nie. Dis ‘n lang tyd en heelwat meer as wat jy gewoonlik het om met jou geliefdes te spandeer.
Vir al hierdie tyd word ons heeltemal te min betaal. Werk is oor die algemeen redelik aaklig en mens verduur dit omdat jy ook ‘n DVD-speler wil hê om in jou klein bietjie vrye tyd te sien wat van daai klompie op die Lost eiland gaan word.
Jy sal gereeld hoor hoe hulle tyd by die werk mors en hoe dom en eenvoudig hulle base is.
So waarom, o waarom is jy so verskriklik trots op daai goedkoop gholfhempie met die maatskappy se groot vet logo op? Is werk vir jou so fantasties dat jy dit selfs in jou vrye tyd wil ondersteun en jouself volunteer as ‘n bewegende advertensiebord? Met jou T-hemp. Daai kak stukkie lap wat jou baas laat maak het omdat hulle nie hierdie jaar bonusse uitbetaal nie.
Hoekom daar stop? Gaan gesels ook gerus met jou baas om jou kar ook te beplak met ‘n moerse logo oor die bonnet. Dan verteer jy jou maatskappy in verkeer ook. Jy ken mos nie kantoorure nie. Jou aap.

Is Dit Net Ek Of Is Al Tos is in 2008 geskryf en uitgegee en daar was so baie copies verkoop dat ons dit in 2009 laat herdruk het. All-in-all is daar nog net so 10 onverkoopte copies oor op aarde en ons sal teen Augustus se kant besluit wat om met hulle te maak. Kort antwoord – dis nie tans te koop nie.