1) Jy weet as jy lekker sit en gesels en beide jy en die ander persoon tel ‘n reukie op wat defnislis ‘n teken is dat iemand in kak getrap het en jy prewel saggies ‘n gebedjie dat dit nie jy is nie, maar dan voila, daar sit die evidence onderaan jou skoen? Dis plus-minus die gevoel wat mens het nadat Hlaudi Motsoeneng, voormalige misdryfshoof van die Es-Eina-Bee-See besluit het hy was nou lank genoeg uit die kollig gewees en daarom het hy hierdie week ‘n perskonferensie gehou om hangende sake uit te klaar. Kyk, ou Rooi-oog is redelik selfversekerd hy gaan vrygespreek word na sy komende dissiplinêre verhoor en dat hy weer in sy pos aangestel sal word. Die kamer waar die media toegespreek is was vol Hlaudi ondersteuners wat blykbaar die hele tyd hande geklap het en gejuig het as hy sy bek oopgemaak het. Van hulle het selfs CDs saamgebring van ‘n album wat aan hom opgedra is, maar blykbaar was 90% van die CD ‘n pot kak.
2) Gepraat van 90%… het jy geweet dat 90% van die land se rykdom in blanke besit is? En dat wit mans 97% van die Johannesburgse Aandelebeurs besit? Dit en ander “feite” het aan die lig gekom in ‘n omstrede blog deur ‘n ene Shelley Garland wat deur Huffington Post geplaas is. Die kanse dat jy ‘n eerlike ANC-minister gaan kry is groter as dat jy en Shelley Garland saam ‘n koppie tee gaan drink. Want sien, Shelley bestaan nie. Sy is so fiktief soos diep Kurt Darren lirieke. Die blog is eintlik deur Marius Roodt geskryf. Wie hy? Wel, ‘n fokken nobody. Die 37-jarige navorser het gedink dit sal pret wees om te sien of Huffington Post die blog sal plaas waarin hy aanbeveel dat wit mans hul regte om te stem ontneem word vir tussen 20 en 30 jaar ten einde die ongeregtighede van die verlede reg te stel. Eers het Verashni Pillay, die redakteur van Huffington Post, die blog en die plasing daarvan verdedig. Maar toe sy agterkom daar is meer feite agterop ‘n Smartie-boksie, het sy vinnig teruggekrabbel en gesê dat dit vir haar hartseer is dat dit onder haar leiding gebeur het. Dankie Verashni. Als ok. 82% van alle blanke Suid-Afrikaners het jou reeds vergewe. Nee genuine.
3) Die EFF het weer ‘n beroep gedoen op die Suid-Afrikaanse regering om Die Stem-gedeelte uit die nasionale volkslied te verwyder. Dit in dieselfde week waarin die Geïntegreerde Ontwikkelingsplan-beraad in Midrand in chaos ontaard het toe geweld uitgebreek het en ANC-lede verrigtinge ontwrig het. Een raadslid is met ‘n baksteen teen die kop geslaan en ‘n EFF-lid het ‘n moerse sny aan sy kop opgedoen. Niemand weet waar die aanval op die EFF-lid vandaan gekom het nie, maar dit kon uit die blou van onse hemel gewees het… selfs uit die diepte van ons see…

4) Die DA het die Openbare Beskermer gevra om ondersoek in te stel na die goue handdruk wat Brian Molefe, voormalige hoof van Eskom, ontvang het. Nadat hy slegs 18 maande aan die stuur van sake was, het hy R30 miljoen ontvang as ‘n tjeers-vir-eers. Daai is nie ‘n goue handdruk nie pappa. Dis ‘n goue blowjob. Die belastingbetaler word droog gesuig, maar Molefe kry die happy ending.

5) Die buzz frase op almal se lippe is Radical Economic Transformation (RET). Adjunk-president Cyril Ramaphosa het die term op ‘n sake-dinee deur die Black Business Council rondgegooi en aangedui dat mense maar verlief daarmee moet neem. Dit gaan gebeur en dit gaan vinnig gebeur. Alhoewel ek tot ‘n mate die meriete van so iets kan insien as dit sal dien as ‘n aanduiding van hoe die regering al vir 23 jaar rondtos, het ek ook my bedenkinge. Want RET nou ‘n volk en RET nou ‘n nasie met sulke baantjies vir boeties.