High Maintenance – daai bra wat die duiwel se blaarslaai aflewer

In Snotstories deur griffinRek jou bek

deur Melt Sieberhagen
Almal is deesdae ‘n televisie-ekspert. Want almal kyk televisie. Almal loop ook elke dag, maar jy sien nie hoe mense met totale selfvertroue in die openbaar konstante opinies, opmerkings en oordele rondgooi oor ander mense se manier van loop, waar hulle loop of hoe hulle op die verkeerde manier loop nie. En almal het ‘n opinie oor televisie. Hierdie is nie ‘n resensie nie. Dis ‘n voorstel. Wel, eintlik net ‘n skimp.

Met die beskikbaarheid van streaming is “binge watching” nou die nuwe catchphrase. Stop jouself so vol televisie soos ‘n kind homself by ‘n rooikoeldrankpartytjie vol kaaskrulle stop. Het iemand nou al die Afrikaanse word vir ‘binge watching’ gepatenteer? Jy kan nou 8 seisoene van ‘n reeks kyk en dit is jou natuurlike, demokratiese reg. Mense het hard geveg vir jou reg om te kan kies waarop jy jou tyd wil spandeer. Dis jou TV. Jou subscription. Dis selfs jou reg om braai spice oor die popcorn te gooi as jy wil.
Anyway, daar is ‘n pakhuis vol reekse daarbuite en jy kan ure van jou lewe belê, as jy ure het. Sommige van ons moet egter nog werk ook, en dis waar ‘n lekker klein, kort reeks soos High Maintenance inkom. Net ses episodes in ‘n season. So jy hoef nie ‘n dokterbriefie te kry om te sien hoe dinge eindig nie. Die hoofkarakter in die storie is die paar kuite van ‘n ou wat dagga verkoop in New York. (Seker tegnies gesproke die ou self, maar sy delivery vehicle is ‘n fiets, so dis beslis sy kuite wat die hardste werk). In elke episode ontmoet ons die verskeidenheid karakters wat hom bel vir n bietjie kleurvolle kool. Gewone mense, buitengewone mense en mense wat die klassifikasie vir “mense” ook maar net-net maak. Maar almal gelink aan die hoofkarakter.

Okay, maar laat ons nou eerlik wees: “Hoofkarakter” is dalk ‘n bietjie van ‘n oorskatting van die man. Wat seker eintlik die idee is. Hy’s net die goue draadjie wat deur alles loop, maar daar is ‘n episode of twee waarin hy skaars feature. Die reeks gaan beslis nie net oor hom nie. Kyk, dis nie vir sensitiewe siele nie. Eksplisiet en aweregs, maar erg vermaaklik. Dis lekker om te sien hoe ander mense lewe. En alhoewel hierdie mense as ‘gewoon’ beskou kan word in die konteks van New York waarin ons hulle ontmoet, is hulle alles behalwe garden-variety normaal.

Die hoofkarakter het nie eers ‘n naam nie, en as jy meer bewyse soek dat die reeks glad nie oor hom gaan nie, is die feit dat selfs IMDB sy karakter “The Guy” noem nogal ‘n goeie aanduiding. Seker nie ‘n slegte manier om dinge te doen nie, aangesien Ben Sinclair, wat die hoofrol speel, ook die skrywer en regisseur is. Wel, een van hulle. Hy’t die reeks geskryf en geregisseer saam met sy vrou, Katja Blichfield. Hulle is nou besig om saam te werk aan die tweede reeks, maar as eks-man en eks-vrou. Ek hoop die feit dat die verhouding nie meer is wat dit was nie, het nie ‘n slegte effek op die nuwe season nie, want die twee van hulle het daarin geslaag om ‘n blik op ‘n wye verkseidenheid kulture in die Groot Appel te gooi.
Ons kort meer ‘vignette’-erige TV reeks. ‘n Mens het nie altyd dae van jou lewe om te belê in die eskepades van ‘n wetenskap-onnie wat in sy onnie meth kook nie. High Maintenance is drie ure van jou lewe wat jy met liefde sal opgee. Dalk sommer ses, want die verskeidenheid karaktes en storie-in-‘n-storie stories, maak dit ideaal om sommer weer te kyk.

So sit terug, skop jou skoene uit en bel die ou wat jou giggelgras kom aflewer. Dis tyd vir High Maintenance…

Op Showmax sal jy altyd iets vind om te kyk wat binne jou smaak val. Duisende ure se vermaak waardeur jy kan rondkrap. Sign hierso op vir ‘n 14-dae free Showmax trial om te sien presies wat ons bedoel.

griffinHigh Maintenance – daai bra wat die duiwel se blaarslaai aflewer

Gooi Comment